کھٹمنڈو، 8 اگست 2026 (غفران):نیپال میں امدادی کارکنوں نے ایک ایسے مقام پر پانچ لاشیں دیکھی ہیں جہاں گزشتہ سال پانچ کوہ پیما لاپتا ہوگئے تھے، حکام نے ہفتے کے روز بتایا۔تین غیر ملکی کوہ پیما، جن میں ایک اطالوی نژاد کینیڈین، ایک اطالوی اور ایک جرمن شہری شامل ہیں، جبکہ دو نیپالی شہری بھی گزشتہ سال نومبر سے لاپتا ہیں۔ یہ کوہ پیما یالونگ ری پہاڑ پر برفانی تودے کی زد میں آنے کے بعد لاپتا ہوئے تھے۔دو دیگر کوہ پیما، جن میں ایک اطالوی اور ایک فرانسیسی شہری شامل تھے، پہاڑ کے بیس کیمپ پر ہلاک ہوگئے تھے۔ یالونگ ری پہاڑ نیپال کے ضلع دولکھا میں واقع ہے اور اس کی بلندی 5,630 میٹر (18,470 فٹ) ہے۔ یہ علاقہ چین کے تبت خطے کی سرحد کے قریب واقع ہے۔ گوری شنکر دیہی میونسپلٹی کے تھابندرا کمار کفلی نے بتایا کہ کوہ پیمائی کمپنی کی جانب سے لاشوں کی تلاش کے لیے تعینات کیے گئے کارکنوں نے جمعہ کے روز انہیں دیکھا۔ غیر ملکی کوہ پیماؤں کی رہنمائی کرنے والی کمپنی ’ڈریمرز ڈیسٹینیشن‘ کے فربا ٹینزنگ شیرپا نے بتایا کہ امدادی ٹیم لاشوں تک پہنچنے کی کوشش کر رہی ہے، تاہم خراب موسم کے باعث انہیں مشکلات کا سامنا ہے۔انہوں نے بتایا کہ وہ مقام کے قریب بونگر کھولا میں موجود ہیں، جہاں ایک ہیلی کاپٹر موسم صاف ہونے اور حدِ نگاہ بہتر ہونے کا انتظار کر رہا ہے۔فربا ٹینزنگ شیرپا کے مطابق ممکنہ طور پر برف پگھلنے کے بعد لاشیں سطح پر نمودار ہوئی ہیں۔تاہم فوری طور پر یہ تصدیق نہیں ہوسکی کہ آیا ملنے والی پانچ لاشیں انہی کوہ پیماؤں کی ہیں جو گزشتہ سال یالونگ ری پر لاپتا ہوئے تھے۔یالونگ ری شمال مشرقی نیپال کی رولوالنگ وادی میں واقع ہے، جہاں کوہ پیماؤں کو چٹان، برف اور برفانی سطح پر مشتمل دشوار گزار راستوں کا سامنا کرنا پڑتا ہے۔