گلاسگو، یکم اگست 2026 (نوشین): پاکستانی خاتون باکسر فاطمہ زہرہ نے کامن ویلتھ گیمز میں شاندار کارکردگی کا مظاہرہ کرتے ہوئے تاریخ رقم کر دی۔ وہ کامن ویلتھ گیمز میں باکسنگ کا تمغہ جیتنے والی پاکستان کی پہلی خاتون باکسر بن گئی ہیں۔ فاطمہ زہرہ سیمی فائنل میں شکست کے باوجود کانسی کا تمغہ اپنے نام کرنے میں کامیاب رہیں۔ اگرچہ وہ گولڈ میڈل کی دوڑ سے باہر ہوگئیں، تاہم ان کی یہ کامیابی پاکستان کی کھیلوں کی تاریخ میں ایک اہم سنگِ میل قرار دی جا رہی ہے۔
فاطمہ زہرہ کی تاریخی کامیابی پر سرگودھا میں ان کے اہل خانہ نے خوشی اور فخر کا اظہار کیا۔ ان کے والدین کا کہنا تھا کہ فاطمہ نے اپنی محنت، عزم اور بہترین کارکردگی سے ملک و قوم کا سر فخر سے بلند کر دیا ہے۔ انہوں نے اس امید کا اظہار بھی کیا کہ فاطمہ زہرہ مستقبل میں مزید کامیابیاں سمیٹتے ہوئے پاکستان کے لیے گولڈ میڈل بھی جیتیں گی۔ فاطمہ زہرہ کی یہ کامیابی پاکستانی خواتین کھلاڑیوں کے لیے ایک نئی امید اور حوصلے کی علامت بن گئی ہے، جو اس بات کا ثبوت ہے کہ پاکستانی خواتین کھیلوں کے میدان میں عالمی سطح پر نمایاں کامیابیاں حاصل کرنے کی بھرپور صلاحیت رکھتی ہیں۔