
اسلام آباد، 16 نومبر 2026 (غفران): یوکرین نے آبنائے کرچ کے راستے روس کو جزیرہ نما کریمیا سے ملانے والے اہم پل کو نشانہ بنایا ہے، جس کے نتیجے میں اس اہم گزرگاہ پر ٹریفک کی آمدورفت محدود ہو گئی ہے۔ روس کے حمایت یافتہ کریمیا کے گورنر سرگئی اکسیونوف نے پیر کو بتایا کہ حملے کے باعث پل پر ٹریفک کی روانی متاثر ہوئی ہے۔ ٹیلی گرام پر جاری بیان میں انہوں نے نقصان کی نوعیت اور شدت کے بارے میں تفصیلات فراہم نہیں کیں، تاہم کہا کہ پیر کی دوپہر تک پل پر ٹریفک محدود رہے گی۔ یورپ کا طویل ترین پل روسی سرزمین کو کریمیا سے ملاتا ہے، جس پر روس نے 2014 میں یوکرین سے قبضہ کر لیا تھا۔ یہ پل روسی صدر ولادیمیر پیوٹن کے اہم بنیادی ڈھانچے کے منصوبوں میں شمار ہوتا ہے۔ فروری 2022 میں روس کی جانب سے یوکرین پر مکمل حملے کے آغاز کے بعد اس پل کو کئی مرتبہ یوکرینی حملوں کا نشانہ بنایا جا چکا ہے۔ اکتوبر 2022 میں ٹرک بم دھماکے کے نتیجے میں پل کو نقصان پہنچا تھا، جس میں چار افراد ہلاک ہوئے جبکہ کئی ماہ تک اس کی آمدورفت متاثر رہی۔ تازہ حملہ ایک ایسے وقت میں ہوا ہے جب روس نے گزشتہ چند ماہ کے دوران یوکرین میں پلوں اور دیگر بنیادی ڈھانچے کو نشانہ بنانے کے لیے حملوں میں شدت پیدا کر دی ہے، جن میں دارالحکومت کیف بھی شامل ہے۔ دوسری جانب یورپی یونین کے رہنماؤں نے واضح کیا ہے کہ یوکرین اور روس کے درمیان امن مذاکرات میں یورپ کے سکیورٹی ڈھانچے کو موضوع بحث نہیں بنایا جانا چاہیے۔ یورپی رہنماؤں کا کہنا ہے کہ یوکرین کے مستقبل سے متعلق کوئی فیصلہ اس کی شمولیت کے بغیر نہیں ہونا چاہیے اور یورپ کی سلامتی کے معاملات پر یورپی ممالک کی شرکت کے بغیر بات چیت ممکن نہیں۔ جرمن چانسلر فریڈرک مرز نے امن مذاکرات میں یورپی ممالک کی شمولیت سے متعلق روس کے حالیہ مؤقف کو ‘پرانا کھیل’ قرار دیتے ہوئے کہا کہ یورپ اور امریکا اس معاملے پر واضح مؤقف رکھتے ہیں۔ ان کا یہ بیان روس کی جانب سے اس پیشکش کے بعد سامنے آیا ہے کہ اگر یورپی ممالک امن عمل میں کردار ادا کرنے کے لیے آمادگی ظاہر کریں تو انہیں مذاکرات میں شامل کیا جا سکتا ہے۔ روسی حکام کا مطالبہ ہے کہ یوکرین جنگ کے معاملات طے کرنے سے پہلے یورپ کے سکیورٹی ڈھانچے پر وسیع تر معاہدہ کیا جائے۔ روس نے 2022 میں یوکرین پر حملے سے قبل نیٹو سے مطالبہ کیا تھا کہ وہ 1997 کے بعد اتحاد میں شامل ہونے والے ممالک سے اپنی افواج واپس بلائے، تاہم نیٹو نے یہ مطالبہ مسترد کر دیا تھا۔ ادھر امریکی مذاکرات کار جیرڈ کشنر نے جمعرات کو ماسکو میں گفتگو کے دوران بتایا کہ انہوں نے یورپی شراکت داروں کے ساتھ براعظم کے مستقبل کے سکیورٹی ڈھانچے پر مشاورت شروع کر دی ہے۔