کراچی میں بین الاقوامی اسکواش چیمپئن شپ کا آغاز بدھ سے ہوگا

کراچی، 19 اکتوبر 2026 (غفران): پاکستان ایک بار پھر بین الاقوامی اسکواش مقابلوں کی میزبانی کے لیے تیار ہے، جہاں 82 ہزار ڈالر انعامی رقم پر مشتمل وینس اے بی سی اوپن اسکواش چیمپئن شپ بدھ کے روز ڈیفنس اتھارٹی کراچی کے کریک کلب میں شروع ہوگی۔ پانچ روزہ چیمپئن شپ 25 اکتوبر تک جاری رہے گی، جس میں مردوں اور خواتین کے الگ الگ مقابلے منعقد ہوں گے اور ہر ایونٹ کے لیے 41 ہزار ڈالر کی انعامی رقم مختص کی گئی ہے۔ ٹورنامنٹ میں شرکت کے لیے غیرملکی کھلاڑیوں کی پاکستان آمد شروع ہوگئی ہے۔ بین الاقوامی اسکواش کیلنڈر میں شامل اس چیمپئن شپ کے منتظمین کے مطابق ابتدائی راؤنڈ میں دونوں ایونٹس کے ٹاپ آٹھ کھلاڑیوں کو بائی دی جائے گی اور وہ براہِ راست پری کوارٹر فائنل مرحلے میں پہنچ جائیں گے۔ مردوں کے مقابلوں میں انگلینڈ کے عالمی نمبر 25 کرس ملک کو ٹاپ سیڈ قرار دیا گیا ہے، جبکہ مصر کے عالمی نمبر 48 مصطفیٰ السرتی دوسری سیڈ ہوں گے۔ خواتین کے مقابلوں میں انگلینڈ کی عالمی نمبر 27 لوسی ٹرمل ٹاپ سیڈ ہوں گی، جبکہ مصر کی عالمی نمبر 46 امینہ الریحانی کو دوسری سیڈ دی گئی ہے۔ مردوں کے ایونٹ میں پاکستان کے چار کھلاڑی عاصم خان، عبداللہ نواز، ناصر اقبال اور اذان علی خان حصہ لیں گے۔ پشاور سے تعلق رکھنے والی ثنا بہادر، جو سماعت اور گویائی سے محروم ہیں، خواتین کے مقابلوں میں براہِ راست جگہ حاصل کرنے والی واحد پاکستانی کھلاڑی ہیں۔ اس کے علاوہ پاکستانی کھلاڑی رشنا محبوب اور انعم عزیز وائلڈ کارڈ انٹری کے ذریعے چیمپئن شپ میں شرکت کریں گی۔ اس ٹورنامنٹ سے پاکستانی کھلاڑیوں کو بین الاقوامی حریفوں کے خلاف اپنی صلاحیتیں آزمانے اور ملک میں اسکواش کے فروغ کے لیے اہم مواقع میسر آئیں گے۔