مظفرآباد، 24 ستمبر ,2026 (نوشین): پاکستان مسلم لیگ (ن) کے رہنما ڈاکٹر محمد نجیب نقی نے آزاد جموں و کشمیر کے صدر کی حیثیت سے حلف اٹھا لیا۔ آزاد جموں و کشمیر کے چیف جسٹس راجہ سعید اکرم نے صدر ہاؤس مظفرآباد میں منعقدہ تقریب میں ڈاکٹر نجیب نقی سے حلف لیا۔ ڈاکٹر محمد نجیب نقی صدارتی انتخاب میں 32 ووٹ حاصل کرکے آزاد کشمیر کے 23ویں صدر منتخب ہوئے، جبکہ پاکستان پیپلز پارٹی کے امیدوار چوہدری لطیف اکبر نے 13 ووٹ حاصل کیے اور اسمبلی کا ایک رکن غیر حاضر رہا۔ صدارتی انتخاب سابق صدر بیرسٹر سلطان محمود کے انتقال کے بعد جنوری سے خالی عہدہ پُر کرنے کے لیے منعقد کیا گیا۔ آزاد کشمیر قانون ساز اسمبلی سیکریٹریٹ میں صبح 10 بجے سے دوپہر ایک بجے تک پولنگ ہوئی، جس کے بعد ووٹوں کی گنتی اور نتائج کا اعلان کیا گیا۔ آزاد کشمیر کے آئین کے تحت صدر کا انتخاب قانون ساز اسمبلی کے ارکان مجموعی ارکان کی اکثریت سے کرتے ہیں۔ سدھنوتی سے تعلق رکھنے والے ڈاکٹر نجیب نقی اس سے قبل آزاد کشمیر کے وزیر صحت کے طور پر خدمات انجام دے چکے ہیں جبکہ وہ تعلیم اور انفارمیشن ٹیکنالوجی کے قلمدان بھی سنبھال چکے ہیں۔ وزیراعظم شہباز شریف نے ڈاکٹر نجیب نقی کو صدر منتخب ہونے پر مبارکباد دیتے ہوئے امید ظاہر کی کہ وہ اپنی آئینی ذمہ داریاں مؤثر انداز میں انجام دیں گے اور آزاد کشمیر کے عوام کی ترقی و بہبود میں کردار ادا کریں گے۔