بیجنگ — 6 ستمبر 2026 (نوشین) — چین کے مقبول ویڈیو شیئرنگ پلیٹ فارم بلی بلی نے عالمی سطح پر اپنی موجودگی بڑھانے اور یوٹیوب کا مقابلہ کرنے کے لیے کوششیں تیز کر دی ہیں۔ پلیٹ فارم دنیا بھر سے صارفین اور مواد تخلیق کرنے والوں کو اپنی جانب راغب کرنے کے لیے مختلف اقدامات کر رہا ہے۔ غیر ملکی صارفین کے لیے رجسٹریشن کا عمل بھی آسان بنا دیا گیا ہے جبکہ شناختی دستاویزات کی تصدیق کی شرط ختم کر دی گئی ہے۔ بلی بلی چین کے بڑے ویڈیو پلیٹ فارمز میں شامل ہے اور بالخصوص نوجوان صارفین میں مقبول ہے، جہاں مختلف اقسام کا ڈیجیٹل مواد دستیاب ہے۔ عالمی سطح پر مواد تخلیق کرنے والوں کے لیے آمدنی اور مونیٹائزیشن کے بہتر مواقع فراہم کرنا مستقبل میں پلیٹ فارم کی کامیابی میں اہم کردار ادا کر سکتا ہے۔ تاہم، یوٹیوب کے مقابلے میں بلی بلی کو کئی چیلنجز کا سامنا ہوگا، جن میں عالمی صارفین اور مواد تخلیق کرنے والوں کا اعتماد حاصل کرنا اور بین الاقوامی مارکیٹ میں مضبوط مقام بنانا شامل ہے۔ اب دیکھنا یہ ہے کہ بلی بلی عالمی ویڈیو شیئرنگ مارکیٹ میں یوٹیوب کی مضبوط پوزیشن کو کس حد تک چیلنج کرنے میں کامیاب ہوتا ہے۔