بیجنگ، 23 ستمبر 2026 (غفران): چین کے امریکا میں سفیر نے رواں ہفتے واشنگٹن میں چینی صدر شی جن پنگ اور امریکی صدر ڈونلڈ ٹرمپ کے درمیان متوقع ملاقات سے قبل خبردار کیا ہے کہ تائیوان، انسانی حقوق اور دیگر معاملات پر چین کی کچھ ’ریڈ لائنز‘ ہیں جنہیں عبور نہیں کیا جا سکتا۔ سفیر شی فینگ نے کہا کہ چین کی خودمختاری، سلامتی اور ترقیاتی مفادات کا احترام ضروری ہے، جبکہ تائیوان، جمہوریت و انسانی حقوق، ترقی کے راستے و نظام اور ترقی کے حقوق ایسے چار معاملات ہیں جنہیں چیلنج نہیں کیا جا سکتا۔ کمیونسٹ پارٹی کے سرکاری اخبار پیپلز ڈیلی میں شائع مضمون میں شی فینگ نے کہا کہ چین اور امریکا کے درمیان اختلافات کو منظم کرنے کے لیے نیک نیتی ضروری ہے اور واشنگٹن کو قومی سلامتی، معاشی عدم توازن اور جبری مشقت جیسے معاملات کو چین کو محدود کرنے کے لیے بہانے کے طور پر استعمال کرنے سے گریز کرنا چاہیے۔ انہوں نے کہا کہ چین اور امریکا کے درمیان تعاون دونوں ممالک کے لیے فائدہ مند ہے جبکہ محاذ آرائی دونوں کے لیے نقصان دہ ہے۔ اخبار میں شائع ایک الگ تبصرے میں دونوں ممالک کے تعلقات میں حالیہ مشکلات کی وجہ امریکا کی جانب سے چین کے بارے میں مبینہ غلط تصورات اور ’اسٹریٹجک مسابقت‘ کے تصور کو برقرار رکھنا قرار دیا گیا۔ تبصرے میں دونوں ممالک پر زور دیا گیا کہ وہ تعلقات میں موجود مثبت پیش رفت کو برقرار رکھیں، جبکہ واشنگٹن سے پالیسیوں میں تسلسل، کیے گئے وعدوں کی پاسداری اور دوطرفہ تعلقات میں مزید استحکام لانے کا مطالبہ کیا گیا۔