اسلام آباد 22 مئی 2025(کامران راجہ):ملک میں بہت جلد مسابقتی عمل کے ذریعے بجلی خریداری کی مارکیٹ متعارف کرائی جارہی ہے اور اس کیلئے تمام ہوم ورک کر لیا گیا ہے۔ یہ بات وفاقی وزیر پاور ڈویژن نے آج ورلڈ بینک کے مینجنگ ڈائریکٹر آپریشنز کی سربراہی میں ایک وفد سے ملاقات میں کی۔
وفاقی وزیر نے وفد کوبریفنگ دیتے ہوئے کہا کہ ملک میں بجلی کی مسابقتی مارکیٹ متعارف کرانے کیلئے ضروری اقدامات کئے جار ہے ہیں اور اس ضمن میں مارکیٹ آپریٹرکے طور پر کام کرنے والی کمیٹی آئی ایس ایم او کا قیام کیا جاچکا ہے جس میں قابل ترین افراد کا تقرر کیا جارہاہے۔ حکومت اب سنگل خریدار کے طور پر مزید بجلی نہیں خریدے گی۔
وفاقی وزیر نے پاور سیکٹر کے فنانشل سائیڈ پر روشنی ڈالتے ہوئے وفد کو بتایا کہ اہم اصلاحات کی وجہ سے ریکوری میں خاطر خواہ اضافہ ہوا ہے۔ انہوں نے کہا کہ اب وقت آگیا ہے کہ بجلی پر دی جانے والی سبسڈی کو انکے کے حقدار افراد تک پہنچایا جائے۔ اس ضمن میں وفاقی وزیر نے ورلڈبنک سے سپورٹ کی درخواست کی۔
ورلڈبنک کے مینجنگ ڈائریکٹر نے وفاقی وزیر کے سبسڈی کو انکے حقداروں تک پہنچانے اور اسی کا صحیح معنوں میں استعمال کرنے کی حمایت کی اور کہا کہ بنک اس ضمن میں پاور سیکٹر کیلئے خدمات پیش کرے گا۔
وفاقی وزیر نے وفد کو بتایا کہ ملک میں اس وقت اضافی بجلی موجود ہے جس کی مقدار 7000میگاواٹ تک ہے۔ انہوں نے کہا کہ اگر اس بجلی کو پیداواری یا بہت کم مارجن پر بھی صنعتوں کو مہیا کیا جائے تو یہ خطے کی سب سے کم قیمت بجلی ہوگی۔ انہوں نے کہا کہ اس ضمن میں ورلڈ بنک اور دوسرے ڈویلپمنٹ پارٹنرز کے سپورٹ کی ضرورت ہے کیونکہ اس کی وجہ سے ملک کی صنعتی پیداوار میں مثبت اضافے کا امکان ہے۔
ورلڈ بنک کے مینجنگ ڈائریکٹر نے وفاقی وزیر کی تجویز کے ساتھ اتفاق کرتے ہوئے کہا کہ پاور کو بالکل استعمال نہ کرنے سے اس کو مارجنل قیمت پر استعمال میں لانا بہت بہتر ہے۔
وفاقی وزیر نے کہا کہ ہم سردیوں میں اسی قیمت پر بجلی مہیا کرچکے ہیں اور ہم اس کو پورے سال کیلئے کرنا چاہتے ہیں جس میں کوئی بھی سبسڈی شامل نہیں۔وفاقی وزیر نے کہا کہ ہم فیڈر سے لیکر ٹرانسفارمرلیول تک ڈیجیٹل اور سمارٹ سسٹم کی طرف جارہے ہیں۔ انہوں نے کہا کہ ورلڈ بنک کی سپورٹ اس ڈیجیٹل اور سمارٹ سسٹم کے لگانے کیلئے بہت اہم ہے۔
وفاقی وزیر نے پاور سیکٹر میں جاری نجکاری کے عمل کے بارے میں بھی وفد کو آگاہ کیا۔ انہوں نے کہا کہ اس وقت تین بجلی تقسیم کارکمپنیوں کی نجکاری کا عمل شروع ہو چکا ہے جس کو اسی سال کے آخر تک منطقی انجام تک پہنچایا جائے گا۔
وفاقی وزیر نے پاور سیکٹر کی تنظیم ِ نو کے عمل کے بارے میں بھی وفد کو آگاہ کیا۔ انہوں نے کہا کہ شفافیت اور میرٹ لانے کیلئے خریداری اور ٹینڈرنگ سے منسلک سسٹم میں بین الاقوامی معیار کے مطابق تبدیلیاں لائی گئیں ہیں۔ جاری منصوبوں کی تکمیل میں تیزی لانے کیلئے بھی اہم اقدامات کئے گئے ہیں۔
وفدکو پرانے اور بند پڑے سرکاری پاور پلانٹس کی کامیاب نیلامی اور وہا ں پر موجود اہلکاروں کے بارے میں بھی آگاہ کیا۔ وفاقی وزیر نے وفد کو PPMCکے بارے میں بھی آگاہ کیا۔ PPMCپاور سیکٹر کا ٹیکنیکل آرم ہے جس میں پاور سیکٹر کے ایکسپرٹ کام کر رہے ہیں۔
ورلڈ بنک کے کنٹری ڈائریکٹر نے پاور سیکٹر میں جاری ریفارمز کی تعریف کی اور بتایا کہ چونکہ پاور سیکٹر ااس وقت بڑی تیزی سے ان ریفارمز پر کام کر رہا ہے اس لئے ورلڈ بنک 55میلین ڈالرز کے اضافی فنڈز تک کو بھی جاری پراسس کر رہاہے جوکہ ایک قابلِ تحسین عمل ہے۔