میامی ایئرپورٹ پر ایمیزون کا کارگو طیارہ حادثے کا شکار، کم از کم پانچ افراد جاں بحق

میامی، 7 ستمبر 2026 (غفران): میامی انٹرنیشنل ایئرپورٹ پر اتوار کے روز ایمیزون پرائم ایئر کا کارگو طیارہ رن وے سے پھسل کر حادثے کا شکار ہوگیا، جس کے نتیجے میں کم از کم پانچ افراد جاں بحق اور پانچ زخمی ہوگئے۔ حادثے کے دوران طیارے نے زمین پر موجود متعدد گاڑیوں کو ٹکر ماری اور اس میں آگ بھڑک اٹھی۔ وفاقی ایوی ایشن ایڈمنسٹریشن (FAA) کے مطابق پرائم ایئر کی پرواز 7598 مقامی وقت کے مطابق تقریباً دو بجے سان خوان، پورٹو ریکو سے آمد کے بعد ایئرپورٹ کے ترچھے رن وے سے آگے نکل گئی اور شمال مغربی حصے کے قریب جا کر رکی۔ حکام کے مطابق زخمی ہونے والے پانچ افراد میں سے تین کی حالت تشویشناک ہے۔ طیارے میں آگ لگنے کے بعد میامی ڈیڈ فائر ریسکیو کے 60 سے زائد یونٹس موقع پر پہنچے اور فائر فائٹرز نے آگ پر قابو پانے کے ساتھ متاثرہ افراد کو طبی امداد فراہم کی۔ ایمیزون کی جانب سے شمالی کیرولائنا میں قائم کارگو کمپنی 21 ایئر کے زیرِ انتظام یہ طیارہ سان خوان کے لوئس مونوز مارین انٹرنیشنل ایئرپورٹ سے روانہ ہوا تھا۔ پرواز سے متعلق معلومات کے مطابق 32 سال پرانا بوئنگ 767 ابتدا میں مسافر طیارے کے طور پر تیار کیا گیا تھا، جسے بعد ازاں 2015 میں کارگو طیارے میں تبدیل کیا گیا۔ حادثے کے بعد میامی انٹرنیشنل ایئرپورٹ کے تمام رن ویز اور ٹیکسی ویز بند کر دیے گئے جبکہ پروازوں کے لیے گراؤنڈ اسٹاپ نافذ کیا گیا۔ سینکڑوں پروازیں تاخیر کا شکار جبکہ درجنوں منسوخ ہوئیں، اور حکام نے مسافروں کو مزید رکاوٹوں کے لیے تیار رہنے کی ہدایت کی۔ امریکی وزیرِ ٹرانسپورٹ شان ڈفی نے بھی مسافروں کو نمایاں تاخیر اور ممکنہ پروازوں کی منسوخی سے خبردار کیا۔ ایمیزون نے کہا کہ وہ مقامی حکام کے ساتھ مل کر حادثے کی وجوہات جاننے کے لیے کام کر رہا ہے اور اس میں شامل تمام افراد کی حفاظت اور بہبود اس کی اولین ترجیح ہے۔ وفاقی ایوی ایشن ایڈمنسٹریشن نے حادثے کی تحقیقات شروع کر دی ہیں جبکہ نیشنل ٹرانسپورٹیشن سیفٹی بورڈ نے بھی جائے حادثہ سے معلومات اکٹھی کرنا شروع کر دی ہیں۔ حادثے کی فوری وجہ تاحال معلوم نہیں ہو سکی۔