لاہور، 26 اگست 2026 (غفران) — وزیراعلیٰ پنجاب مریم نواز شریف نے اس امر پر زور دیا ہے کہ مسلمانوں کو حضرت محمد ﷺ کی تعلیمات اور سیرت کو اپنی انفرادی اور اجتماعی زندگیوں میں عملی طور پر اپنانا چاہیے۔ عید میلاد النبی ﷺ کے موقع پر اپنے پیغام میں وزیراعلیٰ نے امت مسلمہ کو مبارکباد دیتے ہوئے کہا کہ حضور اکرم ﷺ کی ولادت مسلمانوں کے لیے ایک عظیم نعمت اور شکرگزاری کا موقع ہے۔ مریم نواز نے کہا کہ حضرت محمد ﷺ کی آمد پوری انسانیت کے لیے رحمت، ہدایت اور نور کا پیغام لے کر آئی۔ انہوں نے کہا کہ نبی کریم ﷺ نے معاشرے کے کمزور طبقات کی عزت و تکریم کو یقینی بنایا اور مظلوموں، غلاموں اور خواتین کے حقوق کے لیے آواز بلند کی۔ انہوں نے کہا کہ حضور اکرم ﷺ کی تعلیمات نے انسانیت کو عدل، رحم، مساوات اور انسانی وقار کے احترام کا راستہ دکھایا۔ وزیراعلیٰ نے کہا کہ سیرت النبی ﷺ پر عمل دنیا اور آخرت دونوں میں کامیابی کی کلید ہے۔ انہوں نے اس بات پر زور دیا کہ حضور اکرم ﷺ سے حقیقی محبت کا تقاضا ہے کہ مسلمان آپ ﷺ کی تعلیمات پر عمل کریں اور آپ ﷺ کے اسوۂ حسنہ کو اپنی ذاتی اور معاشرتی زندگی کا عملی حصہ بنائیں۔مریم نواز نے معاشرے میں محبت، اخوت، برداشت، عدل اور انسانیت کے فروغ کے لیے عہد کی تجدید پر بھی زور دیا اور کہا کہ اس مقصد کے لیے حضور اکرم ﷺ کی تعلیمات اور سنتِ مبارکہ کی پیروی ضروری ہے۔