بارسلونا، 6 نومبر 2026 (غفران): برازیلین فٹبالر رافینیا نے رواں سیزن میں شاندار کارکردگی کا مظاہرہ کرتے ہوئے بارسلونا کے اہم ترین اٹیکنگ کھلاڑی کی حیثیت اختیار کرلی ہے، انہوں نے تمام مقابلوں میں 13 میچز کے دوران 19 گول اسکور کرکے ارجنٹائن کے اسٹرائیکر جولین الواریز کو سائن نہ کرنے کے بارسلونا کے فیصلے پر اٹھنے والے سوالات بھی کم کردیے ہیں۔ بارسلونا اتوار کو لا لیگا کے اہم مقابلے میں ایٹلیٹیکو میڈرڈ کا اس کے ہوم گراؤنڈ پر سامنا کرے گا، جہاں رافینیا کی کارکردگی ٹیم کے لیے خصوصی اہمیت رکھتی ہے۔ جولین الواریز نے موسم گرما میں ایٹلیٹیکو میڈرڈ چھوڑ کر بارسلونا میں شمولیت کی کوشش کی تھی، تاہم مجوزہ منتقلی پر دونوں کلبوں کے درمیان اختلافات پیدا ہوگئے تھے۔ بارسلونا کو اکتوبر میں اسٹرائیکر کے حصول کی کوشش پر ہسپانوی فٹبال فیڈریشن نے تقریباً 600 یورو جرمانہ بھی کیا تھا۔ الواریز ایٹلیٹیکو میں ہی رہے، جبکہ بارسلونا نے اپنی حکمت عملی تبدیل کرتے ہوئے کوچ ہانسی فلک کی ہدایت پر رافینیا کو بطور سینٹر فارورڈ کھیلنے کا موقع دیا، جس کا نتیجہ توقعات سے بڑھ کر سامنے آیا۔ ابتدا میں رافینیا کو اس نئے کردار کے حوالے سے کچھ تحفظات تھے، خصوصاً رابرٹ لیوانڈوسکی کی جگہ کھیلنے اور گول کی جانب پشت کرکے کھیلنے کے دباؤ کے باعث، تاہم انہوں نے اپنی شاندار کارکردگی سے ان خدشات کو غلط ثابت کردیا۔ ان کی بہترین فارم کی بدولت بارسلونا نے سیزن کے آغاز میں تمام مقابلوں میں مسلسل 11 کامیابیاں حاصل کیں، تاہم بعد ازاں پیرس سینٹ جرمین اور ریال میڈرڈ کے خلاف اسے مسلسل دو شکستوں کا سامنا کرنا پڑا۔ ستمبر میں برازیل کی جانب سے کھیلتے ہوئے ران کی انجری کے باعث رافینیا بھی اپنی بہترین فارم میں نظر نہیں آئے۔ انہوں نے ریال میڈرڈ کے خلاف 2-1 کی شکست میں ایک گول ضرور کیا، تاہم بعد کے مقابلوں میں ایلاویس اور آسٹن ولا کے خلاف چار گول کرکے اپنی مکمل فٹنس اور فارم ثابت کردی۔ ان کی شاندار کارکردگی کے اعتراف میں بارسلونا نے جمعرات کو ان کے معاہدے میں 2030 تک توسیع کردی۔ رافینیا 2022 میں لیڈز یونائیٹڈ سے بارسلونا آئے تھے اور سابق کوچ شاوی ہرنینڈز کے دور میں انہیں اپنی صلاحیتوں کے اظہار کے لیے زیادہ مواقع نہیں مل سکے، تاہم ہانسی فلک کی آمد اور ان کی ہائی پریسنگ حکمت عملی نے برازیلین کھلاڑی کے کھیل کو نئی جہت دی، جس کے بعد وہ ٹیم کے اہم ترین کھلاڑیوں اور کپتانوں میں شامل ہوگئے۔ دوسری جانب جولین الواریز ایٹلیٹیکو میڈرڈ میں اپنی بہترین فارم حاصل کرنے کے لیے جدوجہد کر رہے ہیں اور اب تک 11 میچز میں صرف دو گول اسکور کرسکے ہیں، اگرچہ حالیہ ہفتوں میں ان کی کارکردگی میں بہتری آئی ہے۔ لا لیگا میں بارسلونا سرفہرست ہے جبکہ دوسرے نمبر پر موجود ایٹلیٹیکو میڈرڈ اس سے دو پوائنٹس پیچھے ہے۔ اتوار کا مقابلہ رافینیا کے لیے بھی اہم ہوگا، جو گزشتہ سیزن انجری کے باعث ایٹلیٹیکو کے خلاف چیمپئنز لیگ کے کوارٹر فائنل میں بارسلونا کی شکست کے وقت ٹیم کا حصہ نہیں تھے۔ نئی معاہدے کی توسیع اور بحال ہونے والی فارم کے ساتھ رافینیا اس بار ایٹلیٹیکو میڈرڈ کے خلاف بارسلونا کو کامیابی دلانے اور یہ ثابت کرنے کے لیے پرعزم ہوں گے کہ وہی ٹیم کے لیے مطلوبہ اسٹرائیکر ہیں۔