اسلام آباد، 21 اکتوبر 2026 (کامران راجہ): پاکستان میں جاپان کے سفیر اکاماتسو شوئیچی نے بدھ کے روز اسلام آباد کے علاقے ترنول میں ٹائن گرلز ماڈل پرائمری اسکول کا افتتاح کیا۔ اسکول کی تعمیر کا منصوبہ حکومتِ جاپان کے مالی تعاون سے مکمل کیا گیا، جس پر کمیونٹی سروسز پروگرام (سی ایس پی) نے عمل درآمد کیا۔ یہ غیر سرکاری تنظیم پاکستان بھر میں تعلیم، صحت، صاف پانی کی فراہمی اور خواتین کو بااختیار بنانے کے ذریعے کمزور اور محروم طبقات کی زندگیوں میں بہتری لانے کے لیے کام کر رہی ہے۔ حکومتِ جاپان نے اسکول کی تعمیر کے لیے گراس روٹس ہیومن سکیورٹی پروجیکٹس (جی جی پی) پروگرام کے تحت 44 ہزار 25 امریکی ڈالر کی مالی معاونت فراہم کی۔ افتتاحی تقریب میں جاپانی سفارت خانے کے حکام، سی ایس پی کے نمائندوں، اساتذہ، طالبات، والدین اور مقامی کمیونٹی کے افراد نے شرکت کی۔ نو تعمیر شدہ اسکول میں آٹھ جماعتوں کے کمرے، پرنسپل کا دفتر، بیت الخلا، ہموار کھیل کا میدان اور طالبات کے لیے 250 کرسیاں شامل ہیں۔ سی ایس پی نے اضافی وسائل فراہم کرتے ہوئے شمسی توانائی کا نظام، زیرِ زمین پانی ذخیرہ کرنے کا ٹینک، بجلی سے چلنے والا واٹر کولر اور ڈیجیٹل تعلیم کے فروغ کے لیے انٹرایکٹو اسمارٹ بورڈ بھی نصب کیا۔ اس منصوبے کا مقصد ترنول میں لڑکیوں کے لیے معیاری تعلیمی سہولیات کی کمی کو دور کرنا ہے، جہاں مختلف رکاوٹوں کے باعث بچیوں کو تعلیم کے حصول میں مشکلات کا سامنا کرنا پڑتا ہے۔ اسکول میں اس وقت 240 طالبات زیرِ تعلیم ہیں، جبکہ یہاں 250 طالبات کو تعلیم فراہم کرنے کی گنجائش موجود ہے۔ یہ ادارہ بچیوں کو محفوظ، آرام دہ اور جدید تعلیمی ماحول فراہم کرے گا۔ تقریب سے خطاب کرتے ہوئے جاپانی سفیر اکاماتسو شوئیچی نے مشکل موسمی حالات کے باوجود منصوبہ کامیابی سے مکمل کرنے پر سی ایس پی کو مبارک باد دی۔ انہوں نے کہا کہ تعلیم نہ صرف بنیادی انسانی حق بلکہ انسانی تحفظ کا ایک اہم ستون بھی ہے، جو ایک بہتر اور خوشحال معاشرے کی بنیاد فراہم کرتی ہے۔ سفیر نے پاکستان کے مستقبل کے لیے لڑکیوں کی تعلیم کی اہمیت پر زور دیتے ہوئے کہا کہ پاکستان میں جاپان کے ترقیاتی تعاون میں تعلیم کو کلیدی ترجیح حاصل ہے۔ انہوں نے پاکستان کی پائیدار ترقی کے لیے جاپان کی مسلسل معاونت کے عزم کا اعادہ کیا اور امید ظاہر کی کہ یہ اسکول پاکستان اور جاپان کے درمیان دیرینہ دوستی اور تعاون کی ایک مستقل علامت ثابت ہوگا۔