بتاریخ 24 جنوری 2025 (کامران راجہ):ائرپورٹس سیکورٹی فورس کی اسلام آباد ائیر پورٹ پر کارروائی۔ اے ایس ایف کے عملے نے بروقت کارروائی کرکے اسلام آباد سے مسقط جانے والی پرواز پر ایک مسافر سے 2 کلو گرام سے آئس ہیروئن برآمد کرلی۔
تفصیلات کے مطابق اے ایس ایف کے عملے نے اسلام آباد سے مسقط کی پرواز پر سفر کررہے ایک مسافر امین اللہ خان کے سامان میں منشیات کی موجودگی کی نشاندہی کی۔ مسافر نے یہ آئس ہیروئن مٹھائیوں کے ڈبوں میں مہارت سے چھپا رکھی تھی تاہم اے ایس ایف کے پیشہ ورانہ مہارت کے حامل عملے نے نہ صرف اس مٹھائی میں منشیات کی موجودگی کا پتہ لگالیا بلکہ کارروائی کرتے ہوئے مسافر سے 2 کلوگرام آئس ہیروئن برآمد کرکے بیرون ملک منشیات سمگلنگ کی کوشش بھی ناکام بنادی۔
ملزم کو ابتدائی تفتیش کے بعد مزید قانونی کارروائی کے لیے برآمد شدہ منشیات کے ساتھ اے این ایف حکام کے حوالے کردیا گیا۔