واشنگٹن، 9 نومبر 2026 (غفران): امریکی صدر ڈونلڈ ٹرمپ نے ایران کے ساتھ دوبارہ فوجی تصادم کے امکان کو انتہائی کم قرار دیتے ہوئے کہا ہے کہ وہ فوجی کارروائی دوبارہ شروع کرنے کے بجائے تہران کے ساتھ ایک مضبوط معاہدہ کرنے کو ترجیح دیں گے، تاہم انہوں نے خبردار کیا کہ آئندہ کی حکمت عملی کا انحصار اس بات پر ہوگا کہ آیا ایران امریکا کے ساتھ ایک مضبوط معاہدے پر دستخط کرنے کے لیے تیار ہوتا ہے یا نہیں۔ خبر رساں ادارے ایجنسی فرانس پریس (اے ایف پی) کے مطابق ٹرمپ نے امریکی ٹی وی چینل سی این این کو انٹرویو دیتے ہوئے کہا کہ ایران کے ساتھ دوبارہ لڑائی شروع ہونے کے امکانات بہت کم ہیں۔ انہوں نے کہا کہ اگر ضرورت پیش آئی تو امریکا دوبارہ فوجی کارروائی کرسکتا ہے، تاہم موجودہ صورت حال پہلے سے مختلف ہے۔ امریکی صدر کا کہنا تھا کہ ایران کے خلاف پہلے ہی انتہائی سخت فوجی کارروائی کی جاچکی ہے اور امریکا نے اسے بہت زیادہ نقصان پہنچایا ہے، جس کی شدت کا اندازہ لگانا آسان نہیں۔ ٹرمپ نے واضح کیا کہ ایران کے خلاف دوبارہ جنگ شروع کرنے یا نہ کرنے کا فیصلہ دونوں ممالک کے درمیان ممکنہ معاہدے سے منسلک ہے۔ ان کے مطابق اگر ایران امریکا کے ساتھ ایک مضبوط معاہدہ کرلیتا ہے تو صورت حال مختلف ہوسکتی ہے، جس سے ظاہر ہوتا ہے کہ اس مرحلے پر وہ سفارتی حل کو ترجیح دے رہے ہیں۔ ٹرمپ کا یہ بیان ایسے وقت میں سامنے آیا ہے جب ان کی قطر کے وزیراعظم سے متوقع ملاقات ہونے والی ہے، جو واشنگٹن اور تہران کے درمیان کشیدگی کم کرنے کے لیے ثالثی کا اہم کردار ادا کر رہے ہیں۔ قطر دونوں ممالک کے درمیان سفارتی رابطوں اور ممکنہ معاہدے کے لیے کوششیں کررہا ہے۔ تاہم ٹرمپ کے بیان سے یہ ظاہر نہیں ہوتا کہ کسی نئے معاہدے کو حتمی شکل دے دی گئی ہے یا مذاکرات میں کوئی فیصلہ کن پیش رفت ہوئی ہے۔