اکیڈمک سٹاف ایسوسی ایشن کی جنرل باڈی اجلاس کا انعقاد۔ نئی بھرتیوں اور ترقیوں میں سب کو ‘لیول پلینگ فیلڈ’ ملے گا۔ڈاکٹر ناصر محمود

علامہ اقبال اوپن یونیورسٹی شفافیت اور میرٹ پر مکمل یقین رکھتی ہے، کوئی کام خلاف قاعدہ نہیں ہوگا، قواعد و ضوابط کی پاسداری کریں گے اور میرٹ کے اصولوں پر کاربند رہیں گے،کسی کے ساتھ امتیازی سلوک نہیں کیا جائے گا، نئی بھرتیوں اور ترقیوں میں تمام ملازمین کو ‘لیول پلینگ فیلڈ’ ملے گا”۔اِن خیالات کا اظہار علامہ اقبال اوپن یونیورسٹی کے وائس چانسلر، پروفیسر ڈاکٹر ناصر محمود نے گذشتہ روز اکیڈمک سٹاف ایسوسی ایشن(اے ایس اے)کی جنرل باڈی اجلاس سے خطاب کرتے ہوئے کیا۔ ڈاکٹر ناصر کا کہنا تھا کہ یونیورسٹی میں کام کرنے والے ملازمین، آفیسرز اور اساتذہ اگر ہمارے ہیں تو ادارہ بھی ہمارا ہے،ہم اپنے سٹاف کو اکاموڈیٹ کرنے کے لئے منصفانہ مواقع فراہم کرسکتے ہیں، اب یہ ملازمین پر منحصر ہے کہ وہ اِن مواقعوں سے فائدہ حاصل کرنے کے لئے خود کو کتنا اپ ڈیٹ کرسکتے ہیں، معیار پر پورا اترنے کے لئے اپنی تعلیمی قابلیت اور اہلیت میں کتنا اضافہ کرسکتے ہیں۔اے ایس اے کے مطالبے پر وائس چانسلر نے کہا کہ میں پوری کوشش کروں گا کہ یونیورسٹی کی ایگزیکٹو کونسل سے ملازمین، آفیسرز اور اساتذہ کی میڈیکل سبسڈی اور او ڈی ایل الاؤنسز میں سے کسی ایک یا دونوں میں مناسب اضافہ منظور کراسکوں۔دوران ملازمت وفات پانے والے ملازمین کے ورثاء کے امدادی پیکج کے مطالبے کے حواب میں وائس چانسلر نے کہا کہ 2014ء کے امداد ی پیکج کے نفاذ کے لئے رجسٹرار سے بات کروں گا۔تقریب کے آغاز پر جنرل سیکرٹری، ڈاکٹر عبدالستار نے اجلاس کا ایجنڈا پیش کیا۔اوپن فورم میں فیکلٹی ممبران نے ڈپارٹمنٹل پروموشن کے لئے تیار کردہ نئے کیریٹریا کو مسترد کردیا اور مطالبہ کیا کہ اس کیریٹریاں پر نظرثانی کی جائے۔صدر اے ایس اے،ڈاکٹرمحمد اقبال احمد نے بھی اس موقع پر اپنے خطاب میں جامعہ کی بہتری اور فیکلٹی کی فلاح و بہبود کے لئے وائس چانسلر کو اپنی گزارشات پیش کیں۔صدر نے کہا کہ خالی آسامیوں کا اشتہار شائع کرنا اور سیلیکشن بورڈ کا جلد از جلد انعقاد ہی ہمارا سب سے بڑا مسئلہ تھا جس کو وائس چانسلر نے حل کردیا ہے جس پر ہم وائس چانسلر کے شکر گزار ہیں۔

 

Sub Editor: Nosheen