اسلام آباد، 16 اکتوبر 2026 (غفران): انگلینڈ کی ون ڈے انٹرنیشنل کرکٹ ٹیم پاکستان، انگلینڈ اور سری لنکا پر مشتمل سہ ملکی سیریز میں شرکت کے لیے جمعے کو پاکستان پہنچ گئی۔ مہمان ٹیم اسلام آباد انٹرنیشنل ایئرپورٹ پہنچی، جہاں پاکستان کرکٹ بورڈ کے حکام نے کھلاڑیوں کا استقبال کیا۔ بعد ازاں انگلش ٹیم اپنے ہوٹل روانہ ہوگئی، جبکہ ہفتے کو راولپنڈی کرکٹ اسٹیڈیم میں پریکٹس سیشن شیڈول ہے۔ سہ ملکی سیریز کا آغاز 18 اکتوبر کو ہوگا، جس کے افتتاحی میچ میں پاکستان اور سری لنکا کی ٹیمیں راولپنڈی کرکٹ اسٹیڈیم میں مدمقابل ہوں گی۔ پاکستان اور انگلینڈ کے درمیان میچ 20 اکتوبر کو اسی اسٹیڈیم میں کھیلا جائے گا۔ ٹورنامنٹ کے تمام میچز راولپنڈی اور لاہور میں منعقد ہوں گے، جبکہ فائنل 31 اکتوبر کو لاہور کے قذافی اسٹیڈیم میں کھیلا جائے گا۔