بینڈ، اوریگن، 16 اکتوبر 2026 (نوشین): امریکی ریاست اوریگن کے شہر بینڈ میں سلور ریل ایلیمنٹری اسکول میں فائرنگ کے واقعے میں تین بچوں اور مشتبہ حملہ آور سمیت کم از کم پانچ افراد ہلاک ہوگئے۔ میڈیا رپورٹس کے مطابق جمعرات کو ایک مسلح شخص نے اسکول میں فائرنگ کی، جس کے نتیجے میں بچوں سمیت متعدد افراد زخمی ہوئے، بعد ازاں حملہ آور بھی ہلاک پایا گیا۔ سی این این اور سی بی ایس نیوز نے قانون نافذ کرنے والے اداروں کے ذرائع کے حوالے سے بتایا کہ فائرنگ کے واقعے میں ایک بالغ شخص اور تین بچے ہلاک ہوئے، جبکہ بعد کی رپورٹس میں حملہ آور کی شناخت 16 سالہ لڑکے کے طور پر کی گئی۔ پولیس کے مطابق دوپہر تقریباً ایک بجے پہلی ہنگامی کال موصول ہوئی، جس میں بتایا گیا کہ ایک نامعلوم شخص نے اسکول کے باہر ایک گاڑی پر فائرنگ کی ہے۔ کچھ ہی دیر بعد ہنگامی سروسز کو مزید کالز موصول ہوئیں، جن میں اطلاع دی گئی کہ ایک شخص اسکول میں داخل ہوکر فائرنگ کر رہا ہے۔ پولیس اہلکار چند سیکنڈ میں موقع پر پہنچے تو مشتبہ حملہ آور مردہ حالت میں ملا۔ حکام کے مطابق ممکنہ طور پر اسے وہاں موجود کسی مسلح شخص نے گولی ماری تھی۔ بینڈ پولیس ڈیپارٹمنٹ کی ترجمان شیلا ملر نے بتایا کہ تفتیش کار تاحال اس بات کی تصدیق نہیں کرسکے کہ حملہ آور کو کس نے گولی ماری۔ کم از کم دو زخمیوں کو اسپتال منتقل کیا گیا، تاہم ان کی حالت کے بارے میں فوری طور پر معلومات سامنے نہیں آئیں۔ پولیس نے متعدد متاثرین کی موجودگی کی تصدیق کرتے ہوئے بتایا کہ زخمیوں اور متاثرین میں بچے بھی شامل ہیں۔ سلور ریل ایلیمنٹری اسکول میں کنڈرگارٹن سے پانچویں جماعت تک کے تقریباً 450 طلبہ زیر تعلیم ہیں، جبکہ عملے کی تعداد 40 ہے۔ امریکی رکنِ کانگریس میکسین ڈیکسٹر نے واقعے کو ریاست اوریگن کے لیے ایک افسوسناک دن قرار دیتے ہوئے اسکولوں میں بچوں کی حفاظت یقینی بنانے کے لیے مزید اقدامات پر زور دیا۔ ریاست اوریگن کی گورنر ٹینا کوٹیک نے بھی واقعے پر افسوس کا اظہار کرتے ہوئے عوام سے ایک دوسرے کا ساتھ دینے کی اپیل کی۔ ایف بی آئی کے سربراہ کاش پٹیل نے کہا کہ وفاقی اہلکار تحقیقات میں مقامی حکام کی معاونت کر رہے ہیں اور انہیں تمام ضروری وسائل فراہم کیے جائیں گے۔