اسلام آباد، یکم نومبر 2026 (نوشین): ایران کا تقریباً 20 لاکھ بیرل خام تیل لے جانے والا ایک آئل ٹینکر ساڑھے تین ماہ کے طویل سفر کے بعد امریکی بحری ناکہ بندی کے باوجود چین کی بندرگاہ پر پہنچ گیا ہے۔ ٹینکرز کی نقل و حرکت پر نظر رکھنے والی ایک کمپنی نے سیٹلائٹ تصاویر کے ذریعے جہاز کی چینی بندرگاہ پر موجودگی کی تصدیق کی ہے۔ تاہم کمپنی نے بندرگاہ کا نام، جہاز کی ملکیت اور اس کے طے کردہ راستے سے متعلق مزید تفصیلات فراہم نہیں کیں۔ یہ پیش رفت ایسے وقت میں سامنے آئی ہے جب امریکہ ایران کی تیل کی برآمدات محدود کرنے اور اس کی بحری تجارت روکنے کی کوششیں جاری رکھے ہوئے ہے۔ ایرانی میڈیا نے اس سے قبل رپورٹ کیا تھا کہ امریکہ کی جانب سے 14 جولائی کو بحری ناکہ بندی عائد کیے جانے کے بعد کوئی ایرانی آئل ٹینکر چین نہیں پہنچ سکا۔ تازہ ترین اطلاعات درست ثابت ہونے کی صورت میں اسے امریکی پابندیوں اور بحری تجارتی رکاوٹوں کے باوجود ایران کی جانب سے خام تیل کی ترسیل جاری رکھنے کی اہم پیش رفت قرار دیا جا رہا ہے۔ چین ایرانی تیل کی برآمدات کی ایک اہم منڈی ہے، تاہم بین الاقوامی پابندیوں کے باعث تیل کی ترسیل، تجارتی لین دین اور ادائیگیوں کے انتظامات میں مشکلات کا سامنا ہے۔