لندن، یکم اکتوبر 2026 (غفران): شہزادہ ہیری اور ان کی اہلیہ میگھن، ڈچز آف سسیکس، نے اپنے بچوں کے اسکول کے قریب دو افراد کی موجودگی کے واقعے پر بین الاقوامی فوٹوگرافروں کے مبینہ طور پر انتہائی غیر ذمہ دارانہ رویے کی مذمت کی ہے۔ نجی حفاظتی اہلکاروں اور اسکول کے عملے نے مبینہ طور پر دو افراد کو بیگ اٹھائے اسکول کی حدود کے اطراف گھومتے اور احاطے کے اندر دیکھنے کے لیے رکتے ہوئے دیکھا، جن کی بعد میں شناخت بین الاقوامی فوٹوگرافروں کے طور پر ہوئی۔ ڈیوک اور ڈچز آف سسیکس کے ترجمان نے اس واقعے کو بچوں کی نجی زندگی میں ناقابل قبول مداخلت قرار دیتے ہوئے اسے غیر معمولی طور پر ناقص فیصلہ سازی قرار دیا۔ ترجمان کے مطابق یہ واقعہ خاص طور پر تشویشناک ہے اور برطانوی فضائیہ کے فیئرفورڈ اڈے پر پیش آنے والے ایک واقعے کے فوراً بعد سامنے آیا ہے۔ پولیس سے بھی واقعے پر مؤقف کے لیے رابطہ کیا گیا ہے۔ برطانوی ذرائع ابلاغ کے اداروں نے آزاد ادارہ برائے صحافتی ضابطہ اخلاق کی درخواست کے بعد اسکول اور سسیکس خاندان کی رہائش گاہ کی جگہ ظاہر کرنے سے گریز کیا ہے۔ یہ واقعہ شہزادہ ہیری کی جانب سے اپنے خاندان کی حفاظت سے متعلق طویل عرصے سے ظاہر کیے جانے والے خدشات کے دوران سامنے آیا ہے۔ رواں ماہ کے آغاز میں ہیری اور میگھن نے مبینہ طور پر اپنے بچوں، شہزادہ آرچی اور شہزادی للی بیٹ، کو تعلیمی سال کے آغاز کے چند روز بعد سابق اسکول سے منتقل کیا تھا اور اس کی وجہ حفاظتی خدشات بتائی گئی تھی۔ ہیری نے 2020 میں شاہی ذمہ داریوں سے دستبرداری کے بعد اپنی سرکاری حفاظتی سہولت میں کمی کے فیصلے کو بھی برطانوی عدالتوں میں چیلنج کیا، تاہم انہیں کامیابی نہیں ملی۔ تازہ واقعہ ایسے وقت میں پیش آیا ہے جب ہیری اور میگھن کی کیلیفورنیا کے شہر مونٹیسیٹو سے برطانیہ واپسی کے بعد مبینہ طور پر باضابطہ حفاظتی خطرات کے جائزے کا انتظار ہے۔ برطانوی ذرائع ابلاغ کے مطابق جوڑے سے ان کے روزمرہ معمولات، بچوں کو اسکول لے جانے کے اوقات، اکثر آنے جانے والے مقامات اور معمول کے سفری راستوں سمیت دیگر معلومات فراہم کرنے کو کہا گیا ہے۔ متعلقہ معلومات اور دیگر شواہد کا برطانیہ کی وزارت داخلہ کے متعلقہ ادارے کی جانب سے جائزہ لیا جائے گا تاکہ یہ تعین کیا جا سکے کہ خاندان کو درپیش خطرے کی سطح میں کوئی تبدیلی آئی ہے یا نہیں۔