اسلام آباد، 11 نومبر 2026 (کامران راجہ): وزیراعظم شہباز شریف نے ترکیہ کے شہر انطالیہ میں کوپ 31 سربراہی اجلاس کے موقع پر ایرانی صدر ڈاکٹر مسعود پزشکیان سے ملاقات کی، جس میں دوطرفہ تعلقات، علاقائی سلامتی اور خطے میں امن و استحکام کے فروغ سے متعلق امور پر تبادلہ خیال کیا گیا۔ وزیراعظم شہباز شریف موسمیاتی تبدیلی سے متعلق عالمی اجلاس میں شرکت کے لیے ترکیہ کے دورے پر ہیں، جہاں وہ متعدد عالمی رہنماؤں سے بھی ملاقاتیں کر رہے ہیں۔ ایرانی صدر سے ملاقات کے دوران دونوں رہنماؤں نے پاکستان اور ایران کے باہمی تعلقات کا جائزہ لیا اور دونوں ہمسایہ ممالک کے درمیان تعاون مزید بڑھانے کے امکانات پر گفتگو کی۔ اس موقع پر علاقائی صورتحال میں ہونے والی تازہ پیش رفت اور باہمی دلچسپی کے دیگر امور بھی زیر بحث آئے، جبکہ خطے میں امن، سلامتی اور استحکام برقرار رکھنے کی اہمیت پر زور دیا گیا۔ ملاقات میں پاکستان اور ایران کے درمیان سفارتی روابط اور دوطرفہ و علاقائی معاملات پر قریبی تعاون جاری رکھنے کی اہمیت بھی اجاگر کی گئی۔