اسلام آباد، 13 اگست 2026 (کامران): چیئرمین سینیٹ سید یوسف رضا گیلانی نے پاکستان کے 79ویں یومِ آزادی کے موقع پر قوم کو دلی مبارکباد پیش کرتے ہوئے برصغیر کے مسلمانوں کی قربانیوں اور قائداعظم محمد علی جناح کی قیادت کو خراجِ تحسین پیش کیا جن کی بدولت ایک آزاد وطن کا حصول ممکن ہوا۔چیئرمین سینیٹ نے کہا کہ 14 اگست کا دن قوم کو آزادی کی اس انمول نعمت اور اس کے حصول کے لیے دی گئی اسلاف کی عظیم قربانیوں کی یاد دلاتا ہے۔ انہوں نے زور دیا کہ پاکستان کی خودمختاری، سلامتی، جمہوریت اور خوشحالی کا تحفظ ایک مشترکہ قومی ذمہ داری ہے۔سید یوسف رضا گیلانی نے کہا کہ قائداعظم محمد علی جناح اور علامہ محمد اقبال کی تعلیمات، خصوصاً اتحاد، ایمان اور تنظیم کے اصول، قوم کے لیے مشعلِ راہ ہیں۔ انہوں نے قومی یکجہتی، سیاسی استحکام، آئین کی بالادستی، قانون کی حکمرانی اور باہمی احترام کی اہمیت پر زور دیا۔انہوں نے کہا کہ پاکستان کا مستقبل اس کے نوجوانوں سے وابستہ ہے اور اس بات کی ضرورت ہے کہ انہیں معیاری تعلیم، ہنر اور روزگار کے مواقع فراہم کیے جائیں تاکہ وہ قومی ترقی میں مؤثر کردار ادا کر سکیں۔چیئرمین سینیٹ نے پاکستان کی مسلح افواج اور سیکیورٹی اداروں کو خراجِ تحسین پیش کیا جنہوں نے وطن کے دفاع، دہشت گردی کے خاتمے اور امن کے قیام کے لیے بے مثال قربانیاں دی ہیں۔ انہوں نے کہا کہ پارلیمنٹ جمہوریت کے استحکام، آئین کی بالادستی اور عوام کے بنیادی حقوق کے تحفظ کے لیے اپنا کردار جاری رکھے گی۔انہوں نے قوم سے اپیل کی کہ وہ اختلافات کو پسِ پشت ڈال کر قومی مفاد کو ترجیح دے اور قائداعظم محمد علی جناح کے وژن کے مطابق ایک مضبوط، پرامن، خوشحال، ترقی یافتہ اور جمہوری پاکستان کی تعمیر کے عزم کی تجدید کرے۔انہوں نے پاکستان کی سلامتی، استحکام، ترقی اور خوشحالی اور قوم کے اتحاد، امن اور قوت کے لیے دعا کی
۔