اسلام آباد، 22 ستمبر، 2026 (نوشین): پاکستان کی منیشہ علی نے انگولا میں انٹرنیشنل مکسڈ مارشل آرٹس فیڈریشن (آئی ایم ایم اے ایف) ورلڈ کپ میں انگولا کی لیونلا ازابیل بلیے کو شکست دے کر گولڈ میڈل جیت لیا۔ دوسرے راؤنڈ کے اختتام سے صرف 15 سیکنڈ قبل گلگت بلتستان سے تعلق رکھنے والی منیشہ علی نے بلیے کے آخری حملے کے جواب میں اسٹینڈنگ گلوٹین چوک کے ذریعے کامیابی حاصل کی۔ آئی ایم ایم اے ایف ورلڈ کپ ایک بین الاقوامی امیچر مکسڈ مارشل آرٹس مقابلہ ہے جس میں دنیا بھر کی 15 سرفہرست ٹیموں نے شرکت کی۔ آئی ایم ایم اے ایف نے سوشل میڈیا پلیٹ فارم ایکس پر منیشہ علی کی کامیابی کو سراہتے ہوئے کہا کہ انہوں نے دوسرے راؤنڈ میں گلوٹین چوک کے ذریعے گولڈ میڈل حاصل کیا۔ منیشہ علی کی کامیابی ایسے وقت میں سامنے آئی ہے جب پاکستان میں خواتین فائٹرز کو کھیل کے میدان میں مزید نمایاں ہونے کے مواقع مل رہے ہیں۔ لاہور میں واقع بریو جِم، جہاں منیشہ علی تربیت حاصل کرتی ہیں، نے انہیں ملک بھر کی نوجوان لڑکیوں کے لیے ایک رول ماڈل قرار دیا اور کہا کہ انہوں نے دنیا کے مشکل ترین کھیلوں میں سے ایک کا انتخاب کیا اور ایک سال سے بھی کم عرصے کی تربیت کے بعد آئی ایم ایم اے ایف گولڈ میڈلسٹ بننے کا اعزاز حاصل کیا۔