امریکہ، 13 نومبر 2026 (نوشین): امریکی صدر ڈونلڈ ٹرمپ نے بظاہر نائب صدر جے ڈی وینس کو خارجہ پالیسی کے معاملات سے دور کرتے ہوئے انہیں داخلی امور پر توجہ مرکوز کرنے کی ہدایت کردی ہے، خصوصاً ڈیموکریٹس کے زیرِ انتظام شہروں اور ریاستوں میں مبینہ جرائم اور بدعنوانی کے خلاف کارروائی پر زور دیا ہے۔ ٹرمپ نے کہا ہے کہ امریکہ کو ایران کے ساتھ کسی معاہدے کی ضرورت نہیں اور انہوں نے جے ڈی وینس کو، جو ایران کے ساتھ جنگ ختم کرانے کی کوششوں میں کردار ادا کر رہے تھے، ملک میں مبینہ مجرمانہ سرگرمیوں پر توجہ دینے کی ہدایت کی ہے۔ یہ ہدایت امریکی اخبار وال اسٹریٹ جرنل کی اس رپورٹ کے ایک روز بعد سامنے آئی ہے جس میں کہا گیا تھا کہ وینس ایک سینئر ایرانی سکیورٹی عہدیدار کے ساتھ براہِ راست امن مذاکرات پر غور کر رہے تھے۔ اس سے ایک ہفتہ قبل وینس نے مڈٹرم انتخابات میں ریپبلکن پارٹی کی شکست کی وجوہات میں ایران کے ساتھ جنگ کو بھی شامل کیا تھا۔ ٹرمپ نے سوشل میڈیا پر اپنے بیان میں کہا کہ واشنگٹن کو اب تہران کے ساتھ کسی معاہدے کی ضرورت نہیں، کیونکہ امریکہ کے پاس ایران کے مالی وسائل اور آبنائے ہرمز سمیت اہم معاملات پر اثر و رسوخ موجود ہے۔ انہوں نے مزید کہا کہ جے ڈی وینس کو ڈیموکریٹس کے زیرِ انتظام شہروں اور ریاستوں میں مبینہ فراڈ کے خلاف مہم کی قیادت سونپی گئی ہے، جس سے ان کے بقول وفاقی بجٹ کو متوازن بنانے میں مدد مل سکتی ہے۔ جے ڈی وینس کو 2028 کے صدارتی انتخابات میں ریپبلکن پارٹی کی نامزدگی کے ممکنہ امیدواروں میں شمار کیا جاتا ہے، تاہم پارٹی کی مڈٹرم انتخابات میں شکست کے بعد وہ خود کو ایران جنگ کے معاملے سے الگ کر چکے ہیں۔