اسلام آباد، 18 اکتوبر 2026 (نوشین): مالدیپ کے صدر ڈاکٹر محمد معیزو وزیر اعظم شہباز شریف کی دعوت پر 20 سے 22 اکتوبر تک پاکستان کا تین روزہ سرکاری دورہ کریں گے۔ دفتر خارجہ نے اتوار کو دورے کی تفصیلات جاری کرتے ہوئے بتایا کہ مالدیپ کے صدر کے ہمراہ خاتون اول ساجدہ محمد اور وزرا سمیت اعلیٰ حکام پر مشتمل ایک اعلیٰ سطحی وفد بھی پاکستان آئے گا۔ دورے کے دوران صدر ڈاکٹر محمد معیزو صدرِ پاکستان سے ملاقات کریں گے، جو ان کے اعزاز میں سرکاری عشائیے کا اہتمام بھی کریں گے۔ مالدیپ کے صدر وزیر اعظم شہباز شریف کے ساتھ وفود کی سطح پر مذاکرات بھی کریں گے، جن میں دوطرفہ تعلقات کے تمام پہلوؤں کا جائزہ لیا جائے گا اور تجارت، سرمایہ کاری، صحت، تعلیم، سیاحت، زراعت، دفاع، بحری سلامتی، ماحولیاتی تبدیلی اور عوامی روابط سمیت مختلف شعبوں میں تعاون کو مزید مضبوط بنانے کے امکانات پر غور کیا جائے گا۔ دونوں رہنما باہمی دلچسپی کے علاقائی اور عالمی امور پر بھی تبادلہ خیال کریں گے۔ دورے کے دوران پاکستان اور مالدیپ کے درمیان کاروباری روابط کو فروغ دینے اور تجارت و سرمایہ کاری کے نئے مواقع تلاش کرنے کے لیے پاکستان مالدیپ بزنس فورم بھی منعقد ہوگا۔ اس موقع پر دوطرفہ تعاون کے مختلف شعبوں میں متعدد معاہدوں اور مفاہمت کی یادداشتوں پر دستخط کیے جانے کا بھی امکان ہے۔ یہ دورہ خصوصی اہمیت کا حامل ہے کیونکہ گیارہ سال بعد مالدیپ کے کسی صدر کا پاکستان کا یہ پہلا سرکاری دورہ ہوگا۔ یہ دورہ 1966 میں پاکستان اور مالدیپ کے درمیان سفارتی تعلقات کے قیام کی 60ویں سالگرہ کے موقع پر ہو رہا ہے۔ پاکستان اور مالدیپ کے تعلقات مشترکہ مذہبی اقدار، باہمی احترام، دیرینہ خیرسگالی اور علاقائی و عالمی فورمز پر قریبی تعاون پر مبنی ہیں۔ توقع ہے کہ اس دورے سے دونوں ممالک کے درمیان دوستانہ تعلقات مزید مستحکم ہوں گے اور مختلف شعبوں میں تعاون کو وسعت ملے گی۔