نیویارک، 20 اکتوبر 2026 (غفران): غزہ میں اسرائیلی فوج کے علی الصبح ایک رہائشی اپارٹمنٹ پر حملے کے نتیجے میں میاں بیوی جاں بحق جبکہ متعدد افراد زخمی ہوگئے، دوسری جانب جنوبی یمن میں حوثی باغیوں کے فوجی تربیتی مرکز پر میزائل حملے میں ہلاکتوں کی تعداد بڑھ کر 73 ہوگئی ہے۔ شفا اسپتال، جہاں دونوں جاں بحق افراد کی لاشیں لائی گئیں، نے تصدیق کی کہ ہلاک ہونے والے میاں بیوی تھے۔ اسرائیلی فوج نے دعویٰ کیا کہ حملے میں حماس کے ایک جنگجو کو نشانہ بنایا گیا۔ یہ حملہ پیر کے روز ہونے والے اسرائیلی حملوں کے بعد کیا گیا، جن میں کم از کم چار افراد ہلاک ہوئے تھے۔ اسرائیل اور حماس کے درمیان ایک سال سے زائد عرصہ قبل جنگ بندی کے معاہدے کے باوجود غزہ میں تشدد کا سلسلہ جاری ہے۔ غزہ کی وزارت صحت کے مطابق جنگ بندی کے بعد سے اسرائیلی حملوں میں 1,500 سے زائد فلسطینی جاں بحق ہوچکے ہیں۔ وزارت صحت کی جانب سے جاری کردہ اعدادوشمار میں عام شہریوں اور جنگجوؤں کی الگ الگ تعداد بیان نہیں کی جاتی، تاہم وزارت کے مطابق جاں بحق ہونے والوں میں تقریباً نصف خواتین اور بچے شامل ہیں۔ ادھر یمن کے فوجی اور حکومتی حکام نے بتایا کہ پیر کے روز جنوبی یمن میں العَلَم فوجی تربیتی مرکز پر حوثی باغیوں کے میزائل حملے میں ہلاکتوں کی تعداد 73 ہوگئی ہے جبکہ 200 سے زائد نئے بھرتی ہونے والے اہلکار زخمی ہوئے ہیں۔ ایران کے حمایت یافتہ حوثی باغیوں نے مبینہ طور پر تربیتی مرکز پر بیلسٹک میزائل داغے، جہاں نئے اہلکار تربیت حاصل کر رہے تھے۔ حکام کے مطابق متعدد زخمیوں کی حالت تشویشناک ہے، جس کے باعث ہلاکتوں میں مزید اضافے کا خدشہ ہے۔ صوبہ شبوا کی حکومت نے بتایا کہ حوثی باغیوں نے مرکز پر تین بیلسٹک میزائل داغے تھے۔ حوثیوں نے حملے کی ذمہ داری قبول کرتے ہوئے متعدد افراد کے ہلاک اور زخمی ہونے کا دعویٰ کیا، تاہم ہلاکتوں کی تفصیلی تعداد جاری نہیں کی۔ دوسری جانب قطر نے اسرائیلی قیادت پر الزام عائد کیا ہے کہ وہ غزہ جنگ کے مذاکراتی حل میں سنجیدہ دکھائی نہیں دیتی۔ قطری وزارت خارجہ کے ترجمان اور قطری وزیراعظم کے مشیر ماجد الانصاری نے دوحہ میں گلوبل سیکیورٹی فورم سے خطاب کرتے ہوئے کہا کہ فی الحال اسرائیل میں امن کے لیے کوئی قابلِ اعتماد شراکت دار موجود نہیں۔ انہوں نے اسرائیل کے آئندہ قومی انتخابات میں حصہ لینے والی سیاسی جماعتوں اور امیدواروں کے بیانات پر سوال اٹھاتے ہوئے کہا کہ آیا ان میں سے کوئی فلسطینیوں کے ساتھ امن اور خطے میں استحکام کی بات کر رہا ہے۔ ادھر اسرائیلی وزیراعظم بنجمن نیتن یاہو نے اشارہ دیا ہے کہ اسرائیل اور امریکہ ایران پر مزید حملے کرسکتے ہیں۔ امریکی صدر ڈونلڈ ٹرمپ کے ساتھ ویڈیو رابطے کے دوران نیتن یاہو نے کہا کہ ایران کے حوالے سے دونوں ممالک کا ایک اہم کام ابھی باقی ہے اور وہ اسے مل کر مکمل کریں گے۔ انہوں نے ایران کے جوہری ہتھیار حاصل کرنے کے امکان کو بھی خطرہ قرار دیا۔ یہ بیان اسرائیل کے قومی انتخابات سے تقریباً ایک ہفتہ قبل سامنے آیا ہے، جن میں نیتن یاہو کو سخت مقابلے کا سامنا ہے۔ دریں اثنا، ترکی سعودی عرب اور پاکستان کے ساتھ طے پانے والے باہمی دفاعی معاہدے کی پارلیمانی توثیق کے قریب پہنچ گیا ہے۔ ترک سرکاری میڈیا کے مطابق حکومت نے اگست میں تینوں ممالک کے درمیان طے پانے والا معاہدہ منظوری کے لیے پارلیمنٹ میں پیش کردیا ہے۔ معاہدے کو پہلے پارلیمانی کمیٹی میں زیرِ غور لایا جائے گا، جس کے بعد اسے پارلیمنٹ کے عمومی اجلاس میں ووٹنگ کے لیے پیش کیا جائے گا۔ معاہدے کی مکمل تفصیلات تاحال منظرِ عام پر نہیں لائی گئیں، تاہم حکام کے مطابق ترکی اس معاہدے کے تحت سعودی عرب کو فوجی معاونت فراہم کرنے پر غور کر رہا ہے، جبکہ جنگی فوجی دستے بھیجنے کے امکان کو مسترد کیا گیا ہے۔