اسلام آباد، 14 اکتوبر 2026 (نوشین): صدر مملکت آصف علی زرداری نے پاکستان اور ترکیہ کے تعلقات کو مزید مضبوط بنانے پر زور دیتے ہوئے کہا ہے کہ دونوں ممالک کے درمیان دوطرفہ تجارت کو باہمی طور پر طے شدہ 5 ارب ڈالر کے ہدف تک پہنچانے، سرمایہ کاری میں اضافے اور تزویراتی شعبوں سمیت جدید ٹیکنالوجی میں تعاون کو فروغ دینے کی ضرورت ہے۔ صدر مملکت نے ان خیالات کا اظہار پاکستان کی ترکیہ کے لیے نامزد سفیر آمنہ بلوچ سے ملاقات کے دوران کیا، جنہوں نے ایوان صدر میں ان سے ملاقات کی۔ صدر سیکرٹریٹ کے شعبہ ذرائع ابلاغ کی جانب سے جاری بیان کے مطابق صدر آصف علی زرداری نے آمنہ بلوچ کو نئی ذمہ داری سنبھالنے پر مبارک باد دی اور بطور سیکرٹری خارجہ ان کی خدمات کو سراہا۔ انہوں نے کہا کہ پاکستان ترکیہ کے ساتھ اپنے دیرینہ تعلقات کو انتہائی اہمیت دیتا ہے، جو مشترکہ اقدار، ثقافتی ہم آہنگی اور امن و خوشحالی کے مشترکہ مقاصد پر مبنی ہیں۔ صدر مملکت نے توانائی، زراعت، لائیو اسٹاک، کان کنی، جہاز توڑنے کی صنعت، انفارمیشن ٹیکنالوجی، دفاعی صنعت اور خصوصی اقتصادی زونز سمیت مختلف شعبوں میں تعاون بڑھانے کی ضرورت پر زور دیا۔ انہوں نے جامعات کے درمیان قریبی روابط، عوامی سطح پر تبادلوں میں اضافے اور ثقافتی تعلقات و سیاحت کے فروغ پر بھی زور دیا، خصوصاً سیاحت کے شعبے میں ترکیہ کے تجربات سے استفادہ کرنے کی اہمیت اجاگر کی۔ صدر نے نامزد سفیر کو ہدایت کی کہ وہ ترکیہ میں مقیم پاکستانیوں، طلبہ اور کاروباری برادری کے ساتھ قریبی روابط برقرار رکھیں تاکہ مؤثر قونصلر خدمات کی فراہمی اور ضرورت کے وقت بروقت معاونت یقینی بنائی جا سکے۔ انہوں نے انسانی اسمگلنگ کی روک تھام کے لیے پاکستانی اور ترک اداروں کے درمیان رابطوں اور معلومات کے تبادلے کو مزید مؤثر بنانے کی ضرورت پر بھی زور دیا۔ صدر مملکت نے آمنہ بلوچ سے کہا کہ وہ اپنی سفارتی اسناد پیش کرتے وقت ترکیہ کے صدر رجب طیب اردوان کو ان کی جانب سے نیک تمناؤں کا پیغام پہنچائیں اور نئی ذمہ داریوں کے لیے ان کی کامیابی کی دعا کی۔