ریاض، 16 اکتوبر 2026 (کامران راجہ): سعودی عرب میں حالیہ حملوں کے بعد کھیلوں کے مقابلوں کے انعقاد سے متعلق غیر یقینی صورتحال کے باوجود مقامی منتظمین نے کہا ہے کہ ایشین کپ 2027 کے انعقاد کی تیاریاں شیڈول کے مطابق جاری ہیں اور ٹورنامنٹ آئندہ سال کے آغاز میں ہی ہوگا۔ خبر رساں ادارے رائٹرز کے مطابق ہفتے کے روز ریاض کے بین الاقوامی ہوائی اڈے پر حملے میں کم از کم 12 افراد ہلاک اور 300 سے زائد زخمی ہوگئے تھے، جبکہ یمن کی حوثی تحریک نے اس حملے کی ذمہ داری قبول کی تھی۔ اسے ایک دہائی سے زائد عرصے میں سعودی عرب پر ہونے والا مہلک ترین حملہ قرار دیا گیا ہے۔ ایشین فٹ بال کنفیڈریشن کے سربراہ سلمان بن ابراہیم آل خلیفہ نے رواں ہفتے کے آغاز میں کہا تھا کہ ضرورت پڑنے پر ٹورنامنٹ 2028 تک ملتوی کیا جا سکتا ہے، تاہم مقامی آرگنائزنگ کمیٹی نے 7 جنوری سے 5 فروری 2027 تک جاری رہنے والے اصل شیڈول پر قائم رہنے کا اعلان کیا ہے۔ کمیٹی نے اپنے بیان میں کہا کہ انتظامی اور عملی امور کے تمام شعبوں میں تیاریاں منظور شدہ شیڈول کے مطابق آگے بڑھ رہی ہیں، جن میں کھیلوں کے مقامات، سہولیات اور معاون خدمات کی تیاری بھی شامل ہے۔ کمیٹی کے مطابق ٹورنامنٹ کے حوالے سے پیش رفت پر مسلسل نظر رکھی جائے گی تاکہ ایونٹ کا کامیاب انعقاد یقینی بنایا جا سکے۔ حالیہ حملوں کے اثرات سعودی عرب کے کھیلوں کے کیلنڈر پر بھی پڑے ہیں۔ سکس کنگز سلیم نمائشی ٹینس ٹورنامنٹ اکتوبر سے دسمبر تک ملتوی کر دیا گیا ہے، جبکہ فیفا اور سعودی ای اسپورٹس فیڈریشن نے جمعرات کو فیفا ای فائنلز 2026 کو بھی غیر معینہ مدت کے لیے ملتوی کرنے کا اعلان کیا۔