منامہ، 19 اکتوبر 2026 (نوشین): خلیج تعاون کونسل (جی سی سی) نے یمن کی حوثی ملیشیا کی جانب سے سعودی عرب پر مسلسل حملوں کی شدید مذمت کرتے ہوئے مملکت کے ساتھ مکمل یکجہتی کا اعادہ کیا ہے۔ بحرین کے دارالحکومت منامہ میں 18 اکتوبر کو جی سی سی کی وزارتی کونسل کے 168ویں اجلاس کے بعد جاری اعلامیے میں کہا گیا کہ حوثی ملیشیا نے حرمین شریفین اور ان کے اطراف کے علاقوں، شہری ہوائی اڈوں اور اہم تنصیبات کو نشانہ بنایا، جس کے نتیجے میں متعدد افراد جاں بحق جبکہ بعض شہری زخمی ہوئے۔ کونسل نے ان حملوں کو بین الاقوامی قانون اور بین الاقوامی انسانی قانون کی صریح خلاف ورزی قرار دیا۔ اعلامیے میں جاں بحق افراد کے اہل خانہ سے تعزیت کا اظہار کیا گیا اور زخمیوں کی جلد صحت یابی کے لیے نیک تمناؤں کا اظہار کیا گیا۔ خلیج تعاون کونسل نے واضح کیا کہ رکن ممالک کی سلامتی ناقابلِ تقسیم ہے اور کسی ایک رکن ملک کے خلاف جارحیت کو تمام رکن ممالک کے خلاف جارحیت تصور کیا جائے گا۔ کونسل نے سعودی عرب کی خودمختاری، سلامتی اور قومی مفادات کے تحفظ کے لیے مملکت کی جانب سے کیے جانے والے تمام اقدامات کی حمایت کا بھی اعادہ کیا۔ اعلامیے میں علاقائی سلامتی کے حوالے سے جی سی سی کے مشترکہ مؤقف کو اجاگر کرتے ہوئے اس عزم کا اظہار کیا گیا کہ خطے میں بڑھتے ہوئے خطرات اور کشیدگی کے دوران کونسل سعودی عرب کے ساتھ کھڑی رہے گی۔