Tuesday, November 17

ایمن خان اور منیب بٹ برطانوی پارلیمنٹ میں خصوصی اعزاز سے نواز دیے گئے

Aiman Khan and Muneeb Butt Receive Special Recognition at British Parliament

اسلام آباد، 17 نومبر 2026 (نوشین): پاکستان شوبز انڈسٹری کی معروف جوڑی ایمن خان اور منیب بٹ کو ڈرامہ اور تفریحی شعبے میں خدمات اور بین الاقوامی سطح پر پاکستانی ثقافت کے فروغ کے اعتراف میں لندن میں برطانوی پارلیمنٹ میں خصوصی اعزاز سے نوازا گیا۔ اس موقع پر برطانیہ میں مقیم پاکستانی کمیونٹی کے افراد بھی تقریب میں شریک ہوئے۔ دونوں فنکاروں نے تقریب کی جھلکیاں اور اپنے خطابات کی ویڈیوز سوشل میڈیا پر شیئر کرتے ہوئے ملنے والی پذیرائی اور محبت پر اظہارِ تشکر کیا۔ ایمن خان نے اپنے خطاب میں کہا کہ وہ یہ اعزاز حاصل کرکے خود کو خوش قسمت محسوس کررہی ہیں اور جس طرح پاکستان میں انہیں عوام کی محبت حاصل ہے، اسی طرح برطانیہ میں مقیم پاکستانیوں نے بھی انہیں بھرپور پیار دیا ہے۔ انہوں نے اس کامیابی کا سہرا اپنے شوہر منیب بٹ کے سر بھی باندھتے ہوئے اسے دونوں کی مشترکہ کامیابی قرار دیا۔ دوسری جانب منیب بٹ نے بھی پاکستانی کمیونٹی کی جانب سے ملنے والی محبت اور حمایت پر شکریہ ادا کیا۔ انہوں نے برطانوی پارلیمنٹ کے دورے کے حوالے سے دلچسپ انکشاف کرتے ہوئے بتایا کہ اس تجربے کے بعد ان کی سیاست میں دلچسپی مزید بڑھ گئی ہے۔ منیب بٹ کے مطابق انہوں نے دورے کے دوران ایک رکن پارلیمنٹ سے اپنے خیالات کا تبادلہ بھی کیا۔ اس اعزاز کو پاکستانی فنکاروں کی بین الاقوامی سطح پر بڑھتی ہوئی پذیرائی اور پاکستانی ڈراموں و ثقافت کے عالمی فروغ میں ان کے کردار کی عکاسی قرار دیا جا رہا ہے۔