نیویارک، 26 ستمبر 2026 (کامران راجہ): اقوام متحدہ میں سفارت کاری کے ایک مصروف ہفتے کے دوران دنیا کے پیچیدہ ترین تنازعات پر کوئی بڑی پیش رفت نہ ہو سکی، تاہم ایران اور یوکرین سے متعلق مذاکرات میں محدود پیش رفت ہوئی، جبکہ عالمی رہنماؤں اور ٹیکنالوجی کمپنیوں کے سربراہان نے مصنوعی ذہانت سے لاحق خطرات پر بھی تبادلہ خیال کیا۔ ایران کے معاملے پر امریکی اور ایرانی حکام نے ثالثوں کے ذریعے بالواسطہ مذاکرات کیے، جبکہ تہران امریکی تجاویز کے جواب کا جائزہ لے رہا ہے، جن میں امریکی بحری ناکہ بندی ختم کرنے اور آبنائے ہرمز دوبارہ کھولنے کی تجاویز شامل ہیں، تاہم فوری معاہدے کے امکانات نظر نہیں آئے۔ یوکرین کے معاملے پر امریکی وزیر خارجہ مارکو روبیو نے کہا کہ روس اور یوکرین نے اناج اور توانائی سے متعلق اہداف پر محدود جنگ بندی میں دلچسپی ظاہر کی ہے، تاہم روسی وزیر خارجہ سرگئی لاوروف کی جانب سے ایسے معاملات پر ماسکو کی شمولیت کے واضح آثار سامنے نہیں آئے۔ اقوام متحدہ میں مصنوعی ذہانت بھی اہم موضوع بن کر سامنے آئی، جہاں اوپن اے آئی کے چیف ایگزیکٹو سیم آلٹ مین اور اینتھروپک کے سربراہ داریو اموڈی نے اے آئی سے متعلق خطرات سے نمٹنے کے لیے عالمی تعاون پر زور دیا۔ وینزویلا کی عبوری صدر ڈیلسی روڈریگیز نے اچانک اقوام متحدہ کا دورہ کیا اور امریکی صدر ڈونلڈ ٹرمپ سے عہدہ سنبھالنے کے بعد پہلی مرتبہ بالمشافہ ملاقات کی، جس میں وینزویلا کے قرضوں اور تیل کے شعبے سمیت مختلف امور زیر بحث آئے۔ سوڈان کے فوجی سربراہ عبدالفتاح البرہان امریکی جانب سے ویزا روک لیے جانے کے بعد اقوام متحدہ کی جنرل اسمبلی میں شریک نہ ہو سکے، جبکہ فلسطینی صدر محمود عباس نے ویڈیو لنک کے ذریعے خطاب کیا۔ ہفتے کے دوران اقوام متحدہ کو درپیش مالی مشکلات، محدود ہوتے اثر و رسوخ اور بڑھتی ہوئی جغرافیائی سیاسی کشیدگی بھی نمایاں رہی، جبکہ سیکریٹری جنرل انتونیو گوتریس کی دوسری پانچ سالہ مدت 31 دسمبر کو ختم ہونے کے باعث تنظیم میں قیادت کی منتقلی کا عمل بھی اہم مرحلے میں داخل ہو گیا ہے۔