فلاڈیلفیا، 16 اگست 2026 (کامران راجا): روس کے اسلام مخاچیف نے یو ایف سی 330 کے مرکزی مقابلے میں آئرلینڈ کے ایان ماچاڈو گیری کو متفقہ فیصلے کے ذریعے شکست دے کر اپنا ویلٹر ویٹ ٹائٹل کامیابی سے برقرار رکھا۔پانچ راؤنڈز پر مشتمل سخت اور سنسنی خیز مقابلے میں مخاچیف نے اپنی بہترین گراؤنڈ گیم اور مسلسل ریسلنگ کی بدولت قد اور پہنچ میں برتری رکھنے والے گیری کو قابو میں رکھا۔ تینوں ججز نے مخاچیف کے حق میں فیصلہ دیا۔28 سالہ آئرش چیلنجر نے مقابلے کے دوران چیمپئن کے لیے کئی مشکلات پیدا کیں، خاص طور پر تیسرے راؤنڈ میں گیری نے فاصلے کا بہتر اندازہ لگاتے ہوئے مخاچیف کے جسم اور اگلی ٹانگ پر کئی زوردار ککس لگائیں۔مخاچیف نے پہلے ہی راؤنڈ میں اپنی ریسلنگ کی برتری ثابت کرتے ہوئے تیزی سے سنگل لیگ ٹیک ڈاؤن کے ذریعے گیری کو زمین پر گرا دیا۔ تاہم گیری نے خود کو سنبھالتے ہوئے دوبارہ کھڑے ہونے میں کامیابی حاصل کی اور زیادہ نقصان سے محفوظ رہے۔دوسرے راؤنڈ میں مخاچیف نے گیری کے سر پر ایک زوردار ہائی کک لگائی جس سے وہ لمحاتی طور پر لڑکھڑا گئے، جس کے بعد مقابلہ دوبارہ زمین پر پہنچ گیا۔ گیری نے ایک مرتبہ پھر مزاحمت کا مظاہرہ کرتے ہوئے خود کو سنبھالا اور کھڑے ہونے میں کامیاب رہے۔
تیسرے راؤنڈ کے وسط میں گیری نے مقابلے میں واپسی کی کوشش کی اور اپنی اسٹرائیکنگ کے ذریعے مخاچیف کو فاصلے پر رکھنے میں کامیاب رہے۔ تاہم چوتھے راؤنڈ میں مخاچیف نے ایک مرتبہ پھر اپنی مضبوط گراؤنڈ گیم کا استعمال کرتے ہوئے مقابلے پر کنٹرول حاصل کر لیا۔آخری راؤنڈ میں گیری کو ٹائٹل اپنے نام کرنے کے لیے ممکنہ طور پر ناک آؤٹ یا سبمیشن کی ضرورت تھی، چنانچہ انہوں نے بھرپور حملہ کیا۔ تاہم مخاچیف نے تحمل کا مظاہرہ کرتے ہوئے خطرات سے خود کو محفوظ رکھا اور ججز کے متفقہ فیصلے کے ذریعے کامیابی حاصل کرلی۔مقابلے کے بعد مخاچیف نے اپنے حریف کی تعریف کرتے ہوئے کہا کہ گیری نے انہیں سخت مقابلہ دیا۔مخاچیف نے کہا، “ایان ایک بہترین فائٹر اور اچھے انسان ہیں، میں ان کا احترام کرتا ہوں۔ انہوں نے مجھے مشکل وقت دیا، لیکن میں ہر مقابلے میں خود کو ثابت کرتا رہتا ہوں۔”اس کامیابی کے ساتھ اسلام مخاچیف نے یو ایف سی میں مسلسل 17 فتوحات حاصل کرکے نیا ریکارڈ بھی قائم کردیا۔دوسری جانب شریک مرکزی مقابلے میں امریکی نژاد برازیلی فائٹر میکنزی ڈرن نے کینیڈا کی گلیان رابرٹسن کو متفقہ فیصلے کے ذریعے شکست دے کر خواتین کا اسٹرا ویٹ ٹائٹل بھی برقرار رکھا۔