اسلام آباد، 03 نومبر 2024: احمد ظفر حیات نے 17ویں چیف آف دی نیول اسٹاف امیچور گالف کپ 2024 کا ٹائٹل جیت لیا۔ ارتضی حسین نیٹ کیٹیگری کے فاتح قرار پائے۔ جبکہ عالم افضل، حمنا امجد اور عبداللہ خان نے بالترتیب سینئر، لیڈیز اور جونیئر کیٹیگریز میں ٹائٹل جیتے۔ چیف آف دی نیول اسٹاف ایڈمرل نوید اشرف اختتامی تقریب کے مہمان خصوصی تھے۔
تقریب سے خطاب کرتے ہوئے چیف آف دی نیول اسٹاف نے انعامات حاصل کرنے والے کھلاڑیوں کو ان کی شاندار کامیابی پر مبارکباد پیش کی۔ انہوں نے تمام کھلاڑیوں کو سراہتے ہوئے ان کی مہارت اور اعلیٰ معیار کی تعریف کی۔ انہوں نے اسپانسرز، میڈیا اور مارگلہ گرین گالف کلب کی انتظامیہ کی جانب سے مسلسل اور فراخدلانہ تعاون کی بھی تعریف کی؛ جس کے بغیر گالف کپ کا اتنا شاندار اور کامیاب انعقاد ممکن نہ تھا۔
چار روزہ گالف کپ 31 اکتوبر سے 3 نومبر تک مارگلہ گرینز گالف کلب (MGGC) اسلام آباد میں منعقد ہوا۔ پاکستان بھر سے تقریباً 300 گالفرز نے مختلف کیٹیگریز میں حصہ لیا جن میں امیچوز، سینئرز، لیڈیز اور جونیئرز شامل تھے۔ یہ گالف کپ 2007 سے قومی گولف سرکٹ کا ایک باقاعدہ ایونٹ ہے۔ اس ایونٹ کا مسلسل انعقاد؛ کھیلوں کے فروغ کے لیے، پاک بحریہ کے عزم کا مظہر ہے
اختتامی تقریب میں اعلی افسران، منتظمین، اسپانسرز، گالفرز اور میڈیا سمیت مختلف شخصیات نے شرکت کی۔