ڈارون، 15 اگست 2026 (غفران): آسٹریلوی فاسٹ باؤلر جوش ہیزل ووڈ کو یقین ہے کہ ان کی ٹیم مَرارا اسٹیڈیم میں جاری ٹیسٹ میچ میں پہلی اننگز کے نمایاں خسارے کے باوجود بنگلہ دیش کے خلاف شاندار کم بیک کر سکتی ہے۔ آسٹریلیا نے تیسرے دن کے اختتام پر اپنی دوسری اننگز میں 4 وکٹوں کے نقصان پر 161 رنز بنائے اور اسے اب بھی بنگلہ دیش کی برتری ختم کرنے کے لیے 67 رنز درکار ہیں۔ کیمرون گرین 43 اور ایلکس کیری 19 رنز پر ناٹ آؤٹ تھے، دونوں نے 39 رنز کی ناقابل شکست شراکت قائم کرکے آسٹریلیا کی امیدیں برقرار رکھی ہیں۔ ہیزل ووڈ، جنہوں نے اسی میچ کے دوران ٹیسٹ کرکٹ میں 300 وکٹوں کا سنگ میل عبور کیا، کا کہنا ہے کہ اگر آسٹریلیا چوتھے دن زیادہ سے زیادہ وقت بیٹنگ کرتے ہوئے برتری حاصل کرنے میں کامیاب ہوگیا تو فتح کے امکانات برقرار رہیں گے۔تجربہ کار فاسٹ باؤلر نے تسلیم کیا کہ میچ آگے بڑھنے کے ساتھ ڈارون کی پچ کے رویے کے بارے میں غیر یقینی صورتحال موجود ہے، تاہم انہوں نے کہا کہ پچ پر غیر مستقل باؤنس کے آثار آسٹریلوی باؤلرز کے لیے آخری روز مددگار ثابت ہوسکتے ہیں۔ہیزل ووڈ کے مطابق آسٹریلیا کی پہلی ترجیح باقی خسارہ ختم کرنا اور اس کے بعد بنگلہ دیش پر دباؤ بڑھانا ہوگی، جبکہ ٹیم وکٹیں محفوظ رکھتے ہوئے مضبوط پوزیشن حاصل کرنے کی کوشش کرے گی۔